لاہور ،کرک اگین رپورٹ
محسن نقوی کی کاکول جانیاں اور آنیاں،شاہین معاملے میں کیا بنا
شاہین آفریدی کو چپ کروادیا گیا ہے۔پی سی بی منیجمنٹ نے چیئرمین پی سی بی محسن نقوی کی آج کاکول یاترا سے قبل فیلڈ بنالی تھی ۔ چیئرمین پی سی بی محسن نقوی کاکول میں بابر اعظم اور شاہین آفریدی سے ملاقات کے بعد اب اسلام آباد روانہ ہو گئے ہیں۔ وہ ٹیم کے ساتھ افطار ڈنر کرنے آئے تھے لیکن انہیں ایک اہم میٹنگ کے لیے روانہ ہونا پڑا ۔
آپ اندازا کریں کہ پاکستان کے فینز رات سے پریشان تھے کہ شاہین والے معاملے پر کیا ہوگا،اس کا جواب دینے کی بجائے محسن نقوی نے ٹوئٹ کیا ہے کہ
میں کاکول گیا۔میں نے دیکھا۔میں نے محسوس کیا۔مجھے علم ہوا کہ کاکول میں منظم انداز میں ٹریننگ کا شاندار انتظام ہے۔پاکستان آرمی کے جوان لگے ہیں۔ہمارے کھلاڑی ہائی سپرٹ ہیں۔بڑی ہی مفید ٹریننگ لیتے ہیں۔
پی سی بی کے چیرمین کا کاکول کیمپ کا دورہ
چیئرمین پی سی بی محسن نقوی نے آج ایبٹ آباد میں کاکول کا دورہ کیا اور پاکستان آرمی کے ٹرینرز کی جانب سے پاکستان کے ٹی ٹوئنٹی کھلاڑیوں کے لیے لگائے جانے والے فٹنس کیمپ کا ذاتی طور پر مشاہدہ کیا اس دورے کا مقصد تربیتی کیمپ کے بارے میں جائزہ لینے کے ساتھ ساتھ کیمپ کے انعقاد میں پاک فوج کے تعاون پر شکریہ ادا کرنا تھا۔
فٹنس کیمپ پاکستان کے کھلاڑیوں کی جسمانی صلاحیتوں کو بڑھانے میں اہم کردار ادا کررہا ہے اور اس کا بنیادی مقصد اس بات کو یقینی بنانا ہے کہ وہ آئندہ کرکٹ اسائنمنٹس کے لیے بہترین حالت میں ہوں جس میں اس سال جون میں ہونے والا آئی سی سی ٹی ٹوئنٹی ورلڈ کپ بھی شامل ہے۔
چیئر مین نے کھلاڑیوں سے بات چیت کی اور کیمپ میں ان کی لگن اور فعال شرکت پر ذاتی طور پر ان کی تعریف کی۔ انہوں نے کھلاڑیوں کے جوش و جذبے اور ان کی فٹنس میں اضافے کے بڑھانے کے عزم پر اطمینان کا اظہار کیا۔
کھلاڑیوں سے ملاقات کے علاوہ چیئرمین پی سی بی نے سلیکشن کمیٹی کے ساتھ میٹنگ بھی کی جس میں نیوزی لینڈ کے خلاف ٹی ٹوئنٹی سیریز کے لیے ٹیم کے انتخاب پر بات کی گئی۔ ملاقات میں کپتان بابر اعظم بھی موجود تھے۔
چیئرمین پی سی بی نے بورڈ کی جانب سے ہیڈ کوچ کی تقرری کے حوالے سے ہونے والی پیش رفت پر اراکین کو بھی اعتماد میں لیا۔
پی سی بی کے چیئرمین محسن نقوی کا کہنا ہے کہ میں اپنے کرکٹرز کو سپورٹ کرنے پر پاک فوج کا تہہ دل سے شکریہ ادا کرنا چاہتا ہوں۔ ان کا تعاون نہ صرف ہمارے کھلاڑیوں کی فٹنس لیول میں اضافہ کرے گا بلکہ مستقبل میں انہیں مزید نظم و ضبط کا پابند بھی بنائے گا۔ یہ کیمپ یقینی طور پر کھلاڑیوں کو امریکہ اور ویسٹ انڈیز میں عالمی ٹورنامنٹ کی طرف لے جانے والے ایک چیلنجنگ سفر سے پہلے مستحکم پوزیشن میں رکھے گا۔پی سی بی اپنے کھلاڑیوں کو بین الاقوامی سطح پر بہترین کارکردگی کا مظاہرہ کرنے کے لیے ضروری آلات اور وسائل سے آراستہ کرتے ہوئے انہیں مکمل مدد فراہم کرنے کے لیے موجود ہے۔
