راشد خان نیوزی لینڈ ٹیسٹ سے کیوں باہر،ایک سال طویل فارمیٹ سے معذور،وجہ آگئی

کابل،کرک اگین رپورٹ

راشد خان نیوزی لینڈ ٹیسٹ سے کیوں باہر،ایک سال طویل فارمیٹ سے معذور،وجہ آگئی۔کرکٹ کی تازہ ترین خبریں یہ ہیں کہ یہ نیوز تو بریک ہوچکی ہے کہ راشد خان اگلے ماہ بھارت میں شیڈول نیوزی لینڈ کے خلاف واحد ٹیسٹ میچ نہیں کھیلیں گے کیونکہ افغانستان کرکٹ بورڈ نے اس کیلئے جن 20 کھلاڑیوں کا اعلان کیا تھا،وہ اس میں نہیں تھے لیکن وجہ نہیں بتائی تھی۔

اب افغانستان کرکٹ بورڈ سے انکشاف ہوا ہے کہ وہ صرف اس ایک ٹیسٹ میچ سے ہی باہر نہیں ہوئے بلکہ اگلے ایک سال تک کوئی ٹیسٹ میچ نہیں کھیلیں گے۔اس کی وجہ کمر کی انجری اور تکلیف ہے۔گزشتہ سال ورلڈکپ کے بعد سرجری کروانے والے راشد خان طویل وقفہ کے بعد اس سال ٹی 20 ورلڈکپ کھیلے تھے اور آخری بار اب افغانستان کے ڈومیسٹک ایونٹ میں کھیلے لیکن 3 میچزکے بعد انہیں کمر کی تکلیف شروع ہوگئی،اس وجہ سے انہیں آرام دیا گیا ہے۔

آئی سی سی کے فیوچر ٹورز پروگرام کے مطابق افغانستان کو اس سال کے آخر میں زمبابوے کے خلاف دو ٹیسٹ اور اگلے  سال جولائی میں آئرلینڈ کے خلاف ایک ٹیسٹ میچ کھیلنا ہے۔راشد نے اپنے کیریئر میں پانچ ٹیسٹ میچوں میں 34 وکٹیں حاصل کیں، اور فارمیٹ میں افغانستان کے سب سے زیادہ وکٹیں لینے والے بائولر ہیں۔