راولپنڈی۔کرک اگین رپورٹ۔بابر اعظم چلے نہ رضوان،پاکستان پھر بھی راولپنڈی ٹیسٹ کے پہلے دن ٹاپ پر آگیا،کرکٹ بریکنگ نیوز یہ ہے کہ پاکستان جنوبی افریقا کے خلاف دوسرے ٹیسٹ کے پہلے روز کے اختتام تک بہتر پوزیشن پر ہے لیکن بابر اعظم اور محمد رضوان کا فلاپ شو فینز کو مایس کرگیا ہے۔پروٹیز کیلئے سب سے اہم بات اس میچ کا دوسرا دن ہوگا کہ وہ اسے اپنے حق میں کسی بھی طرح موڑ لیں ۔اگلے ایام بھاری ہونگے۔شان مسعود نے مسلسل دوسرے ٹیسٹ میں بڑی اننگ کھیل کر اپنی پوزیشن بحال کرلی ہے۔
راولپنڈی میں پیر کو شروع ہونے والے دوسرے کرکٹ ٹیسٹ کا ٹاس ایک بار پھر پاکستان کے حق میں گرا۔شان مسعود نے جھٹ سے پہلے بیٹنگ کا اعلان کیا۔ٹیم میں واحد تبدیلی حسن علی کی جگہ 38 سال 299 دن کے سپنر آصف آفریدی کا ڈیبیو ٹیسٹ کیلئے ٹیم میں داخلہ تھا۔جنوبی افریقا کے کپتان ایڈن مارکرم نے ٹاس ہارنے پر مایوسی ظاہر کی لیکن بتایا کہ ٹیم میں 2 تبدیلیاں ہیں۔جن میں سپنر کیشو مہاراج کی انٹری بھی تھی۔
پاکستان کی اننگ کا آغاز اس لئے بھی پرسکون رہا۔جنوبی افریقا کے فیلڈرز نے پہلے اوور سمیت عبداللہ شفیق کے 2 کیچز ڈراپ کردیئے۔ساتھ میں ایک بار وہ یوں خوش قسنت بنے کہ بال وکٹوں کو لگنے کے باوجود بیلز نہ گرنے سے ناٹ آئوٹ ہی رہے۔اتنے مواقع کے باوجود جنوبی افریقا نے پہلی وکٹ 35 کے سکور پر اس وقت حاصل کرلی جب امام الحق 17 رنزبناکر سپنر ہارمر کی بال پر کلین بولڈ ہوئے۔شان مسعود آئے اور آج کے خوش قسمت بیٹر عبد اللہ شفیق کے ساتھ سکور کو 35 سے 146 تک لے گئے۔111 رنز کی اہم شراکت بھی یہاں ہارمر نے توڑی،جب انہوں نے عبداللہ کو کیچ کرواہی دیا۔انہوں نے146 بالز پر 57 رنزکی اننگ کھیلی۔21 رنز کے اضافہ سے سب کی نگاہ میں رہنے والے بابر اعظم ایک بار پھر فلاپ ہوئے۔167 سکور ہوا تھا کہ وہ 16 رنزبناکر کیشو مہاراج کی بال پر ڈی زورزی کے ہا تھوں کیچ ہوئے۔وہ 3 سال سے ٹیسٹ سنچری سے محروم چلے آرہے ہیں۔سعود شکیل آئے تو سیٹ بیٹر شان مسعود کے ساتھ پاکستان کو ریسکیو کیا لیکن پاکستانی کپتان شان مسعود یوں بد قسمت بنے کہ ایک بار پھر سنچری سے محروم رہے۔وہ 176 بالز پر 87 رنزکر کے آئوٹ ہوئے،انہوں نے 3 چھکے اور 2 چوکے لگائے،ان کی وکٹ مہاراج نے لی۔پاکستان کا سکور اس وقت 212 ہو اتھا۔،246 کے سکور پر محمد رضوان 19 رنزبناکر وکٹ دے گئے۔وہ پیسر راباد کی بال پر ایل بی ہوئے۔
پاکستان نے دن بھر کے 91 اوورز میں 5 وکٹ پر 259 رنزبنائے ہیں۔سعود شکیل 42 اورسلمان علی آغا 10 پر ناقابل شکست ہیں۔جنوبی افریقا کی جانب سے کیشو مہاراج نے 61 اور سائم ہارپر نے 75 رنز دے کر 2،2 وکٹیں لیں،ربادا نے ایک آئوٹ کیا۔
