لاہور، 20 اکتوبر۔کرک اگین رپورٹ۔اسلام آباد سے فیصلہ،محمد رضوان ون ڈے کپتانی سے برطرف،شاہین آفریدی نئے قائد مقرر۔کرکٹ بریکنگ نیوز ہے کہ
پاکستان کرکٹ بورڈ نے شاہین شاہ آفریدی کو پاکستان کی ون ڈے ٹیم کا کپتان مقرر کر دیا ہے۔ بائیں ہاتھ کے فاسٹ باولر جنوبی افریقہ کے خلاف تین میچوں کی ون ڈے انٹرنیشنل سیریز میں پاکستان کی قیادت کریں گے، جو 4 سے 8 نومبر تک فیصل آباد کے اقبال سٹیڈیم میں کھیلی جائے گی۔
محمد رضوان کی کپتانی میں پاکستان نے آسٹریلیا کو آسٹریلیا میں قریب اڑھائی عشرے بعد ہرایا تھا اور پھر جنوبی افریقا میں ہسٹری میں پہلی بار ون ڈے سیریز جیتی تھی لیکن صلہ میں انہیں برطرفی ملی ہے۔یوں پی سی بی نے پاکستان کرکٹ سے بابر اعظم اور محمد رضوان کی کہانی بطور کپتان باب بند کردیا گیا۔
شاہین کی اس سیریز کے لیے تقرری آج اسلام آباد میں ہونے والے اجلاس کے بعد کی گئی، جس میں وائٹ بال ہیڈ کوچ مائیک ہیسن، ڈائریکٹر ہائی پرفارمنس عاقب جاوید اور سلیکشن کمیٹی کے ارکان نے شرکت کی۔25سالہ فاسٹ باولر نے پاکستان کی جانب سے 66 ون ڈے اور 92 ٹی ٹوئنٹی میچز کھیلے ہیں، جن میں انہوں نے مجموعی طور پر 249 وکٹیں حاصل کیں۔ 32 ٹیسٹ میچوں میں، جن میں راولپنڈی کرکٹ سٹیڈیم میں جنوبی افریقہ کے خلاف جاری دوسرا ٹیسٹ شامل نہیں، شاہین نے 120 وکٹیں حاصل کی ہیں۔
شاہین اس سے قبل 2024 میں نیوزی لینڈ کے خلاف ان کے ہوم گراؤنڈ پر پانچ ٹی ٹوئنٹی انٹرنیشنل میچوں میں پاکستان کی قیادت کر چکے ہیں۔
