دبئی،ممبئی:کرک اگین رپورٹ
بھارت کا چیمپئنز ٹرافی کیلئے پاکستان آنے سے انکار ،ایونٹ منتقلی سمیت 3 آپشنز پر کام تیز
چیمپئنز ٹرافی 2025 کی سب سے بڑی بریکنگ نیوز یہ ہے کہ بھارت کی حکومت نے اپنی کرکٹ ٹیم کو پاکستان کے سفر کی اجازت دینے سے انکار کردیا ہے۔یوں آئی سی سی نے ایونٹ کی پاکستان سے مکمل طور پر منتقلی سمیت 3 آپشنز پر کام شروع کردیا۔حتمی اعلان اگلے ماہ کی 15 تاریخ تک ہوگا۔
انٹرنیشنل کرکٹ کونسل (آئی سی سی) چیمپئنز ٹرافی کو مکمل طور پر پاکستان سے باہر منتقل کرنے پر غور کر رہی ہے۔بھارتی صحافی وکرانت گپتا کے مطابق آئی سی سی کے پاس تین آپشنز ہیں۔ آئی سی سی چیمپئنز ٹرافی 2025 کا دبئی سری لنکا یا جنوبی افریقہ میں انعقاد ان میں سے ایک پلان ہے۔دوسرا پاکستان میں پورا ٹورنامنٹ کھیلنا ہے، تیسرا ہائبرڈ ماڈل کے لیے جانا ہے، پاکستان لیگ کے زیادہ تر میچوں کی میزبانی کرےگا جبکہ دبئی کو ٹیم انڈیا کے کھیل، سیمی فائنل اور فائنل ملیں گے ۔بین الاقوامی کرکٹ کی سب سے بڑی باڈی تینوں آپشنز کے لیے بجٹ تیار کر رہی ہے۔ اس وقت ممکنہ طور پر ہائبرڈ ماڈل پہلا آپشن ہو گا، جس میں پی سی بی میزبانی کے حقوق کو برقرار رکھے گا۔
اگر چیمپئنز ٹرافی کو پاکستان سے باہر منتقل کیا جاتا ہے تو اس سے پی سی بی کو مالی طور پر نقصان پہنچ سکتا ہے، کیونکہ پاکستان کرکٹ کا ادارہ اسٹیڈیم کی تزئین و آرائش پر بہت زیادہ رقم خرچ کر رہا ہے۔پاکستان میں ٹورنامنٹ کے مستقبل کے حوالے سے فیصلہ نومبر کے وسط تک کیا جائے گا۔
بھارت نے 2008 کے ایشیا کپ کے بعد سے پاکستان کا سفر نہیں کیا ہے، اور موجودہ حکومت نے بھارت کی قومی کرکٹ ٹیم کو عالمی ٹورنامنٹ کے لیے کوئی منظوری نہیں دی ہے۔دونوں ممالک کے درمیان سیاسی کشیدگی کے باعث یہ پالیسی ایک دہائی سے زائد عرصے سے نافذ ہے۔ 2023 ایشیا کپ بھی ایک ہائبرڈ ماڈل میں منعقد کیا گیا تھا، جس میں سری لنکا نے ہندوستانی گیمز اور فائنل کی میزبانی کی تھی جبکہ پاکستان نے دوسرے ممالک کےلیگ گیمز کو برقرار رکھا تھا۔
پاکستان نے 2016 کے ورلڈ کپ اور 2023 کے ون ڈے ورلڈ کپ کے لیے ہندوستان کا دورہ کیا۔
