پاکستان ویمنز ٹیم کو انگلینڈ میں پھر شکست،ون ڈے سیریز بھی گئی

چیمسفرڈ ۔کرک اگین رپورٹ

Getty Images

پاکستان ویمنز ٹیم کو انگلینڈ میں پھر شکست،ون ڈے سیریز بھی گئی۔انگلینڈ ویمنز نے پاکستان ویمنز کو تیسرے اور آخری ون ڈے انٹرنیشنل میں 178 رنز سے ہرادیا۔انگلینڈ نے پہلے بیٹنگ کرتے ہوئے 5 وکٹوں پر 302 رنز بنائے۔نیٹ سیور برنٹ کی سنچری، 124 رنز بناکر ناٹ آؤٹ رہیں۔

پاکستان ٹیم 124 رنز بناکر آؤٹ ۔ منیبہ علی 47 رنز بناکر ٹاپ اسکورر۔سوفی ایکلسٹن کی تین وکٹیں ، ون ڈے انٹرنیشنل میں وکٹوں کی سنچری بھی مکمل کرلیانگلینڈ نے آئی سی سی ویمنز چیمپئن شپ کی سیریز دو صفر سے جیت لی۔

انگلینڈ ویمنز نے نیٹ سیور برنٹ کی سنچری کی بدولت پاکستان ویمنز کو تیسرے اور آخری ون ڈے انٹرنیشنل میں 178 رنز سے شکست دے دی۔

انگلینڈ نے تین میچوں پر مشتمل آئی سی سی ویمنز چیمپئن شپ کی یہ سیریز دو صفر سے جیت لی۔اس نے ڈربی میں پہلا ون ڈے 37 رنز سے جیتا تھا جبکہ ٹاؤنٹن میں دوسرا ون ڈے بارش کی وجہ سے نتیجہ خیز ثابت نہ ہوسکا تھا۔انگلینڈ نے اس سے قبل تین ٹی ٹوئنٹی انٹرنیشنل میچوں کی سیریز بھی تین صفر سے اپنے نام کرلی تھی۔بدھ کے روز چیمسفرڈ میں کھیلے گئے تیسرے اور آخری ون ڈے انٹرنیشنل میں انگلینڈ نے ٹاس جیت کر پہلے بیٹنگ کرتے ہوئے 50 اوورز میں 5 وکٹوں کے نقصان پر 302 رنز بنائے۔

پاکستان ٹیم جواب میں صرف 124 رنز بناکر آؤٹ ہوگئی۔انگلینڈ کی اننگز کی خاص بات نیٹ سیور برنٹ کی شاندار سنچری تھی جنہوں نے 117گیندوں پر14 چوکوں اور2 چھکوں کی مدد سے 124 رنز اسکور کیے اور آؤٹ نہیں ہوئیں۔یہ ون ڈے انٹرنیشنل میں ان کی 9 ویں سنچری ہے۔ڈینی وائٹ نے 44 رنز کی اننگز کھیلی ۔ برنٹ اور ڈینی وائٹ نے چوتھی وکٹ کی شراکت میں 79 رنز کا اضافہ کیا جبکہ برنٹ اور ایلس کیپسی کے درمیان چھٹی وکٹ کی ناقابل شکست شراکت میں 87 رنز بنے۔ ایلس کیپسی 39 رنز بناکر ناٹ آؤٹ رہیں ۔ام ہانی نے 47 رنز دے کر 2 وکٹیں حاصل کیں۔پاکستان کی اننگز میں منیبہ علی نے 7 چوکوں کی مدد سے 47 رنز بنائے۔ سوفی ایکلسٹن نے تین وکٹیں حاصل کیں اس کے ساتھ ہی انہوں نے ون ڈے انٹرنیشنل میں اپنی سو وکٹیں بھی مکمل کرلیں۔

مختصر اسکور ۔
انگلینڈ 302 رنز5 کھلاڑی آؤٹ ( 50 اوورز ) ۔ نیٹ سیور برنٹ 124 ناٹ آؤٹ ۔ ڈینی وائٹ 44۔ ام ہانی 47 / 2 وکٹ۔

پاکستان 124 رنز ( 29.1 اوورز ) ۔ منیبہ علی 47۔ سوفی ایکلسٹن 15 / 3 وکٹ نیٹ سیور برنٹ11 / 2 وکٹ۔ لارین بیل 26 / 2 وکٹ۔
نتیجہ : انگلینڈ نے 178 رنز سے جیتا۔