ڈارون ۔کرک اگین رپورٹ
ڈارون ٹیسٹ،بنگلہ دیش کا آسٹریلیا کو نیا سبق،برتری جاری وساری۔کرکٹ بریکنگ نیوز ہے
ڈارون میں کھیلے جا رہے پہلے کرکٹ ٹیسٹ کے دوسرے دن بنگلہ دیشی بلے بازوں نے کینگروز بولرز کی ایک نہ چلنے دی اور میچ پر اپنی گرفت مضبوط کر لی۔ تنزید حسن کی شاندار سنچری اور کپتان نجم الحسن شانتو کی 84 رنز کی دلکش اننگز کی بدولت بنگلہ دیش نے دوسرے دن کے اختتام تک اپنی پہلی اننگز میں 6 وکٹوں کے نقصان پر 351 رنز بنا کر آسٹریلیا کے خلاف 153 رنز کی اہم برتری حاصل کر لی ہے۔
مومن الحق کی مزاحمت اور تنزید حسن کا تاریخی کارنامہ
کھیل کے دوسرے دن بنگلہ دیش نے اپنی اننگز کو آگے بڑھایا تو انہیں جلد ہی دوسرا نقصان مومن الحق کی شکل میں اٹھانا پڑا، جو بدقسمتی سے اپنی نصف سنچری مکمل نہ کر سکے اور 49 رنز بنا کر پویلین لوٹ گئے۔ تاہم، آؤٹ ہونے سے قبل انہوں نے اوپنر تنزید حسن کے ساتھ مل کر دوسری وکٹ کے لیے 102 رنز کی قیمتی شراکت قائم کر کے ٹیم کو مضبوط بنیاد فراہم کر دی تھی۔
مومن الحق کے جانے کے بعد بھی آسٹریلوی بولرز کے لیے پچاس اوورز تک وکٹ کا قحط رہا۔ حال ہی میں پاکستان کے خلاف اپنا ٹیسٹ ڈیبیو کرنے والے 25 سالہ نوجوان بلے باز تنزید حسن نے آسٹریلیا کی سرزمین پر اپنے کیریئر کے محض دوسرے ٹیسٹ میں ایک یادگار اور جرات مندانہ سنچری اسکور کی۔ انہوں نے کپتان نجم الحسن شانتو کے ساتھ مل کر آسٹریلوی بولنگ لائن کو بے بس کر دیا اور تیسری وکٹ کے لیے مزید 93 رنز جوڑے۔ تنزید حسن 101 رنز کی بہترین اننگز کھیل کر آؤٹ ہوئے۔
مچل اسٹارک کا کم بیک اور بنگلہ دیشی مڈل آرڈر کی لڑکھڑاہٹ
ایک موقع پر بنگلہ دیش کی ٹیم 3 وکٹوں پر 297 رنز بنا کر انتہائی مضبوط پوزیشن میں تھی اور ایسا لگتا تھا کہ وہ آسٹریلیا کو میچ سے مکمل باہر کر دیں گے۔ ایسے میں تجربہ کار فاسٹ بولر مچل اسٹارک نے آسٹریلیا کو بریک تھرو دلایا اور کینگروز نے شاندار واپسی کرتے ہوئے اگلے صرف 11 رنز کے اندر 3 اہم وکٹیں حاصل کر کے میچ کا نقشہ بدل دیا۔
بنگلہ دیش کا اسکور 297 سے اچانک 308 رنز پر 6 وکٹیں ہو گیا۔ آؤٹ ہونے والے کھلاڑیوں میں سیٹ بلے باز نجم الحسن شانتو شامل تھے جو 84 رنز بنا کر سنچری سے محروم رہے، جبکہ لٹن داس کھاتہ کھولے بغیر صفر اور مشفق الرحیم 36 رنز بنا کر پویلین لوٹے۔
مہدی حسن اور حسن محمود کی آخری سیشن میں مزاحمت
مڈل آرڈر کے اچانک پٹڑی سے اترنے کے بعد آسٹریلیا نے میچ پر حاوی ہونے کی کوشش کی، لیکن مہدی حسن معجز اور حسن محمود نے دن کے آخری سیشن میں مزید کوئی نقصان نہ ہونے دیا۔ دونوں بلے بازوں نے آسٹریلوی پیس اٹیک کے سامنے چٹان بن کر مزید 43 رنز کی ناقابلِ شکست شراکت قائم کی اور دوسرے دن کا کھیل ختم ہونے تک اسکور 351 رنز تک پہنچا دیا۔
جب دوسرے دن کے کھیل کا اختتام ہوا تو بنگلہ دیش نے 110 اوورز کی بیٹنگ مکمل کر لی تھی، مہدی حسن میراز 32 اور حسن محمود 13 رنز کے ساتھ کریز پر موجود تھے۔ آسٹریلیا کی جانب سے مچل اسٹارک اور جوش ہیزل ووڈ نے 2، 2 وکٹیں حاصل کیں بنگلہ دیش کو اب تک 153 رنز کی مجموعی برتری حاصل ہے اور اس کی 4 وکٹیں باقی ہیں، جس نے تیسرے دن آسٹریلیا کے لیے ایک بڑا چیلنج کھڑا کر دیا ہے۔
