دورہ سری لنکا کے لئے پی سی بی کا بڑا اہم اعلان

لاہور 2 جون، 2023،پی سی بی میڈیا ریلیز

دورہ سری لنکا کے لئے پی سی بی کا بڑا اہم اعلان۔پاکستان کرکٹ بورڈ نے سری لنکا کے دورے کو ذہن میں رکھتے ہوئے اسی ماہ قومی کرکٹ اکیڈمی لاہور میں اسپن اور فاسٹ بولنگ کے علیحدہ علیحدہ کیمپس کے انعقاد کا فیصلہ کیا ہے۔اسپن بولنگ کیمپ 10 سے 15جون تک منعقد ہوگا جبکہ فاسٹ بولنگ کیمپ کا انعقاد 16 سے 21 جون تک کیا جائے گا۔

اس سلسلے میں تیرہ اسپنرز اور گیارہ فاسٹ بولرز کو ان کیمپس میں مدعو کیا گیا ہے جبکہ 14 بیٹرز بھی کیمپ میں بلائے گئے ہیں۔

یاد رہے کہ پاکستانی کرکٹ ٹیم ورلڈ ٹیسٹ چیمپئن شپ کے سلسلے میں دو ٹیسٹ میچوں کی سیریز کھیلنے آئندہ ماہ سری لنکا کا دورہ کرے گی۔ان دو کیمپس کے انعقاد کا مقصد یہ ہے کہ آنے والے سیزن کے لیے کھلاڑیوں کو تیار کیا جاسکے۔قومی سلیکشن کمیٹی نے ان کیمپس کے لیے پاکستان انڈر19 اور پاکستان شاہینز کے کھلاڑیوں کو مدعو کیا ہے جو قومی ٹیم کے کوچز اور نیشنل کرکٹ اکیڈمی کے کوچز کی نگرانی میں ٹریننگ کریں گے۔ان کیمپس سے سلیکٹرز کو سری لنکا کے خلاف دو ٹیسٹ میچوں کی سیریز کے لیے بہترین کھلاڑیوں کے انتخاب میں مدد ملے گی۔اس کے علاوہ ان کیمپس سے اسپنرز اور فاسٹ بولرز کو بھی مدد ملے گی کہ ان کیمپس کے لیے تیار کردہ خصوصی سیشن میں لمبے اسپیل کرکے اپنی صلاحیتوں میں کس طرح اضافہ کرتے ہیں اور سخت موسمی حالات میں اپنی فٹنس کو کس طرح بہتر بناتے ہیں۔اسی طرح بیٹرز کو بھی ان کیمپس میں سری لنکا کے دورے کے لیے تیاری میں مدد ملے گی۔

پاکستان کرکٹ بورڈ کی جانب سے بلائے گئے ان نوجوان کھلاڑیوں کو ان کیمپس میں آکر پاکستان وے کے بارے میں بھی بہتر طور پر اندازہ ہوسکے گا کہ قومی ٹیم کی کیا توقعات ہوتی ہیں۔ان نوجوان کرکٹرز کو سینئرز کھلاڑیوں کے تجربے سے سیکھنے کا موقع بھی ملے گا۔پاکستان کرکٹ بورڈ نے جن کھلاڑیوں کو کاؤنٹی کرکٹ یا دیگر لیگز میں کھیلنے کی اجازت دے رکھی ہے وہ ان کیمپس میں شامل نہیں ہونگے۔پاکستان کرکٹ بورڈ کا کہنا ہے کہ سرفراز احمد ذاتی مصروفیات، بابر اعظم اور محمد رضوان (حج) اور محمد نواز (رہیب) کے سبب ان کیمپس میں شریک نہیں ہونگے انہوں نے اس سلسلے میں پاکستان کرکٹ بورڈ کو پہلے ہی مطلع کردیا تھا۔

کیمپس کیلئے مدعو کرکٹرز

اسپنرز۔ ابرار احمد ۔ علی اسفند۔ عرفات منہاس۔ فیصل اکرم۔ محمد جنید۔ مہران ممتاز۔ مبصرخان۔ نعمان علی۔ قاسم اکرم۔ ساجد خان۔ سفیان مقیم۔ اسامہ میر اور زاہد محمود۔فاسٹ بولرز۔ عامر جمال۔ ارشد اقبال۔ فہیم اشرف۔ حارث رؤف۔ احسان اللہ۔ محمد حسنین ۔ محمد وسیم جونیئر۔ میر حمزہ۔ محمد علی۔ نسیم شاہ اور شاہنواز دھانی۔بیٹرز۔ عبداللہ شفیق۔حارث سہیل۔ حسیب اللہ ۔حسین طلعت۔ افتخار احمد ۔امام الحق۔ کامران غلام۔ محمد حارث۔ محمد حریرہ۔ عمیر بن یوسف۔ صائم ایوب۔ سلمان علی آغا۔ سعود شکیل اور طیب طاہر۔